“Baka makipag-away ka na naman, Impen,” tinig iyon ng kaniyang ina. Nangangaral na naman. Mula sa kinatatalungkuang giray na batalan, saglit siyang napatigil sa paghuhugas ng mumo sa kamay. ( simula ng “Impeng Negro” ni Rogelio Sikat)

“Maliwanag na sinusubukan na naman sa halalang ito ang luma nang taktikang divide and rule na pamana ng diktadurang US sa kaniyang mga puppet regimes. Nakasalalay din sa Batasang election ang pang-militar at pang-ekonomiyang katatagan sa atin ng Amerika… na ang pananatili dito’y higit naming naglulublob sa kahirapan sa mga mamamayang Pilipino. Pero hindi na tayo palilinlang. Hindi natin isusuko ang pakikipaglaban natin para sa ating mga karapatan! Boykotin natin ang election “84!

Nagising ako kanina, humihingal at pawis na pawis. Nakataas ang kaliwa kong kamay, naninigas, hindi ko maibaba. Sa panaginip ko, may malaking babae, nakasuot ng itim pero hindi ko kita ang mukha, hindi ko alam kung bakit pero hindi ko mailingon ang ulo ko. Madiin at masakit ang pagkakahawak nya sa ‘kin. Napansin ko na itim ang mga kuko nya, graya ang kulay ng balat. Nakakatakot. Parang ganito rin ang panaginip ko nung isang linggo.