गुढीपाडवा किंवा चैत्रपाडवा हा महाराष्ट्रातील एक महत्त्वाचा सण आहे. नववर्षाची सुरुवात गुढीपाडव्यापासून होते. चैत्र महिन्याच्या शुद्ध प्रतिपदेला हा सण साजरा करतात. हा दिवस वसंत ऋतूचा पहिला दिवस असतो. यादिवशी महाराष्ट्रात उत्साह आणि आनंदाचे वातावरण असते. घराघरात गुढी उभारली जाते, रांगोळी काढली जाते. गुढी उभारण्यासाठी एक उंच काठी किंवा बांबू घेऊन तो स्वच्छ धुतात. त्याला रेशमी कपडा बांधून त्यावर तांब्या ठेवतात. गुढीला कडुलिंबाची, आंब्याची पाने, साखरेची माळ (गाठी) व फुलांचा हार घालतात. गुढी हे स्नेहाचे, मांगल्याचे आणि उत्साहाचे प्रतीक आहे. गुढी विजयाचे व समृद्धीचे देखील प्रतीक आहे. गुढीपाडवा साजरा करण्यामागे निसर्गातील बदलांचा विचार केला आहे. चैत्र महिना हा वसंत ऋतूचा महिना आहे. यावेळी आंब्याला मोहोर येतो. हळूहळू ऊन वाढते अशावेळी कडुलिंबाची पाने शरीरातील उष्णता कमी करतात. म्हणून आंब्याची व कडुलिंबाची पाने गुढीत लावतात. कडुलिंबाच्या पानात औषधीगुण असतात. या दिवशी ही पाने खाण्याची पद्धत आहे. चैत्र महिन्याच्या शुद्ध प्रतिपदेला कर्नाटक, आंध्रप्रदेशातही हा सण 'संवत्सर पाडवो' किंवा 'उगादी' या नावाने वेगळ्या पद्धतीने साजरा होतो.