1. Anong hiwaga mayroon ang ngiti. Isang ngiti lang napapawi ang anomang sigalutan. Galit sa dibdib dagling napaparam kung ngiti sa labi ay nasisilayan. Hindi ka man magsalita, ang mga ngiting taglay sa labi ay siyang mangungusap upang pagmamahalan at kapayapaan ay maipadama sa bawat isa.

2. Libangan ko ang pag-aalaga ng isda. Nawawala ang pagod ko kapag nakikita ko silang lumalangoy sa malaki kong akwaryum. Lagi ko silang binibigyan ng paboritong pagkain at madalas kong linisin ang kanilang akwaryum. Iba ang kaligayahang nadarama ko sa pag- aalaga sa mga isda at naniniwala ako na swerte raw ito.

3. Iba-iba ang ginagawa ng mga mag-aaral sa loob ng paaralan sa bakante nilang oras. May mga nagbabasa ng aklat. May mga gumuguhit ng larawan. May mga gumagawa ng paskil o patalastas. May kumakanta at sumasayaw. Sa dakong gulayan ay may mga nagtatanim at ang iba ay nagdidilig. Sa kabila ng kani- kanilang pinagkakaabalahan ay sabay- sabay na silang pumila nang maayos matapos marinig ang bell.

4. Marami tayong magagandang pook sa ating bansa na dinarayo ng mga turista. Nariyan ang Luneta, Fort Santiago sa Maynila. Bulkang Taal sa Batangas at Bulkang Mayon sa Albay. Sa Bohol naman ay may Chocolate Hills. Ang Hagdang-hagdang Palayan o Payew ay hindi rin pahuli. Sa Aklan ang Boracay. Ilan lamang ito sa magagandang lugar na ipinagmamalaki ng mga Pilipino na nakatutulong sa pag-unlad ng ating turismo.

5. Ang mga Tagalog ay may taglay na iba’t ibang mga katangian. Sila ay masayahin, magalang, magiliw at mahilig sa masasarap na pagkain. Ang mga babae ang namamahala sa gastusin ng pamilya. Karamihan sa mga lalaki ay maibigin sa mga kasayahan at may likas na kakayahan sa musika. Mahigpit din ang pagkakabuklod ng mag-anak na Tagalog. Sila rin ay mapamahiin.